Hadithi za Babu 06: Pete ya ajabu part 1

Hapo zamani za kale, katika kijiji kidogo kilichozungukwa na msitu mnene, aliishi kijana mwenye bidii aliyeitwa Lemi. Siku moja alipokuwa akichunga mbuzi wa familia yake karibu na chemchemi ya kijiji, aliona kitu kikiangaza chini ya maji. Aliposogea karibu, aliona pete ya ajabu iliyokuwa na mwanga wa kupendeza, kama jua la asubuhi lililoamsha maua msituni.

Alipoiokota na kuivaa pete hiyo, Lemi alihisi nguvu za ajabu zikimzunguka. Hakuamini macho yake alipogundua kuwa aliweza kusikia sauti za wanyama, hata miti na majani yakiongea. Lemi akaenda moja kwa moja kwa mzee wa kijiji kumuuliza kuhusu pete hiyo. Mzee akamueleza kuwa Pete hiyo ilikuwa na uwezo wa kuunganisha Lemi na viumbe vyote vilivyo hai, lakini aliambiwa na mzee wa kijiji aliyekuwa na hekima nyingi kwamba pete hiyo pia ilikuwa na majaribu na masharti makali.

"Lemi," alisema mzee huyo kwa sauti nzito lakini ya huruma, "pete hii ni baraka, lakini pia ni jaribu kubwa. Utumie kuleta amani na kusaidia viumbe vyote, lakini ukifanya kinyume, itakuletea madhara makubwa."

Kwa siku chache, Lemi aliitumia pete hiyo vizuri. Aliweza kuwasaidia wakazi wa kijiji kumaliza migogoro yao kwa kuelewa lugha ya wanyama, na mara nyingi aliwashauri kutumia hekima aliyojifunza. Lakini kadri muda ulivyopita, alihisi kiburi kikimwingia, akidhani anaweza kuamuru wanyama na hata asili yenyewe kwa kutaka mambo yampendelee.

Siku moja, alikosea sana alipomwamuru simba mmoja mkubwa kuwa mtumwa wake ili kumtisha kijana mwenzake aliyekuwa akimtania. Lakini mara tu alipotoa amri hiyo, pete ilianza kuwaka moto na kumuumiza kidole. Simba aligeuka na kumtazama Lemi kwa macho makali, kisha akaenda zake msituni bila neno.

Sauti ya mzee wa kijiji ilisikika ikimwonya, “Lemi, kumbuka kila kiumbe kina heshima yake. Pete hii ni mwongozo, si amri juu ya wengine. Ukitumia vibaya, utapoteza kila kitu, hata wewe mwenyewe."

Lemi alijutia vitendo vyake na akaenda kwa mzee huyo kumrudishia pete. Mzee alitabasamu, akimwambia, “Lemi, hekima ya kweli si kuwa na nguvu juu ya wengine, bali ni kutumia baraka zako kuwasaidia.”

....itaendele sehemu ya pili