Darsa 3: umuhimu wa haya katika maisha ya Muislamu

Assalamu Alaikum Warahmatullahi Wabarakatuh.

Sifa zote njema ni za Mwenyezi Mungu, Mola wa walimwengu. Rehema na amani zimshukie Mtume MuhammAd ﷺ, familia yake, maswahaba wake na wote wanaofuata mwongozo wake mpaka Siku ya Kiyama.

Ndugu zangu Waislamu, leo tutakumbushana kuhusu umuhimu wa haya katika maisha ya Muislamu. Haya ni tabia njema inayomfanya mtu ajiepushe na maovu, aheshimu mipaka ya Mwenyezi Mungu na kuwa na mwenendo mwema mbele ya watu.

Abdullah bin Umar, Mwenyezi Mungu awaridhie wote wawili, amepokea kuwa Mtume Muhammad, rehema na amani zimshukie, alipita karibu na mtu aliyekuwa akimkemea ndugu yake kwa kuwa na haya. Mtume akasema: Mwache, kwani haya ni sehemu ya imani. Hadithi hii imepokewa na Imam Bukhari na Imam Muslim, na pia imo katika Riyadh As-Swalihin, Hadithi namba 680.

Vilevile, Imran bin Huswain, Mwenyezi Mungu amridhie, amepokea kuwa Mtume alisema: Haya haIleti isipokuwa kheri. Katika riwaya nyingine amesema: Haya yote ni kheri. Hadithi hii imepokewa na Imam Bukhari na Imam Muslim, na imo katika Riyadh As-Swalihin, Hadithi namba 681.

Pia Abu Hurairah, Mwenyezi Mungu amridhie, amepokea kuwa Mtume ﷺ alisema kuwa imani ina matawi mengi. Tawi la juu kabisa ni kumshuhudia Mwenyezi Mungu kuwa ni Mmoja, na tawi la chini ni kuondoa jambo lenye madhara njiani. Kisha akasema kuwa haya ni tawi la imani. Hadithi hii imepokewa na Imam Bukhari na Imam Muslim, na imo katika Riyadh As-Swalihin, Hadithi namba 682.

Aidha, Abu Sa'id Al-Khudri, Mwenyezi Mungu amridhie, ameeleza kuwa Mtume Muhammad ﷺ alikuwa na haya kuliko hata msichana bikira aliyekuwa katika sitara yake. Alipokiona kitu alichokichukia, hali hiyo ilionekana usoni mwake. Hadithi hii imepokewa na Imam Bukhari na Imam Muslim, na imo katika Riyadh As-Swalihin, Hadithi namba 683.

Ndugu zangu, haya si udhaifu wala woga. Ni pambo la Muislamu na ni alama ya ukamilifu wa imani. Mwenye haya hujiheshimu, huwaheshimu wengine na hujiepusha na mambo yanayomchukiza Mwenyezi Mungu. Katika zama hizi ambazo maovu mengi yamekuwa yakihamasishwa, ni muhimu kushikamana na tabia ya haya na kuwalea watoto wetu juu ya maadili haya mema.

Mwenyezi Mungu atujaalie tuwe miongoni mwa wenye haya, wenye imani thabiti na wenye tabia njema.

Wassalamu Alaikum Warahmatullahi Wabarakatuh.